Ambasadorja e SHBA-së, Yuri Kim ka njofuar se pas vendimit për zgjatjen e afatit për vizat amerikane deri në 10 vjet, ka pasur një rritje të aplikimeve. Me anë të një postimi në rrjetet sociale, ambasadorja amerikane shkruan se rritja e aplikimeve për viza, ka sjellë pritje të gjata për intervista.
Ajo thekson faktin se stafi i ambasadës është duke punuar për të zgjidhur çështjen, ndërsa shton se në raste urgjence të vërtetë (për shembull, trajtim mjekësor, vdekje familjare, programe studentore ose shkëmbimi me afat të caktuar), duhet të kërkohet përpunim i përshpejtuar kur aplikohet.
“Pas shpalljes së vizave amerikane 10-vjeçare për shqiptarët dhe lehtësimit të kufizimeve të COVID-it në udhëtime, ka pasur rritje të aplikimeve për viza, gjë që ka sjellë pritje të gjata për intervista. Ne e dimë se kjo është frustruese dhe stafi ynë konsullor po punon fort për të shkurtuar kohën e pritjes. Në raste urgjence të vërteta (për shembull trajtim mjekësor, vdekje familjare, programe studentore ose shkëmbimi me afate të caktuara ju lutemi kërkoni proces të përshpejtuar kur të aplikoni. Ju gjithashtu mund të shkruani në adresën [email protected] PASI të keni bërë kërkesën për proces të përshpejtuar” – shkruan Kim në Twitter.
