Një ditë më parë, disa punëtorë dhe përfaqësues të kompanive që pretendojnë se në nëntor 2017 janë pajisur me leje dhe licencat përkatëse nga çdo ministri, për HEC-et në Skrapar, kanë protestuar, duke bllokuar për 1 orë rrugën nacionale Berat-Skrapar.
I pyetur lidhur me këtë qëndrim, kryeministri Rama tha se qeveria ka reaguar pas asaj që është konstatuar në terren.
“Nuk ka shans që ne t’i hapim më rrugë kësaj barbarie. Ministri i Mjedisit që udhëheq programin tonë ambicioz të rigjelbërimit të të gjitha territoreve të kafshuara dhe masakruara në vite, me shumë prioritet po ndjek gurore për gurore, jo vetëm në Qarkun e Beratit, por në gjithë Shqipërinë këtë përputhshmëri. Kemi bllokuar disa gurore, e do vijojmë kontrollin tek të tjerat. Çdo gurore që kërkon të shfrytëzojë malet dhe kodrat për të nxjerrë duhet, duhet të zbatojë të gjitha standardet e kontratave, pasi ato janë të qarta dhe standardi është i qartë. Nuk mund të kafshosh e të ikësh, por duhet edhe të përmirësosh atë që lë pas. Fëmijët tanë nuk mund të rriten duke asistuar këtë shembull flagrant ët shembjes së të drejtës së tyre dhe të këtij vendi. Zbatimi me përpikmëri i standardeve është objektivi ynë i panegociueshëm”, u shpreh Rama.
