Gazetari shqiptar i emisionit italian “Le Iene” i është bashkuar revoltës së medias mbi paketën Anti-shpifje, që pritet të miratohet sot në Kuvend.
Kopliku i bën thirrje gazetarëve të mos përpiqen të zgjidhin problemin e kësaj pakete famëkeqe me peticione dhe postime në Facebook, por me aksione të mirëorganizuara dhe mbi të gjitha përmes sakrificave.
“Pjetër Arbnori hyri në grevë urie i vetëm në një zyrë të parlamentit për të mbrojtur lirinë e fjalës. Ata që e njohin këtë histori e dinë shumë mirë se kjo nisëm individuale e Mandelës shqiptar, ka qenë ndoshta e vetmja grevë e vërtetë urie, në të cilën Arbnori rrezikoi seriozisht jetën.
Ky akt ekstrem vetësakrifikimi është ndoshta një udhërrëfyes për të gjithë gazetarët e këtij vendi. Një shembull sesi problemi i paketës famëkeqe antishpifje nuk zgjidhet as me peticione e as me postime në fb por me aksion të mirëorganizuara dhe me sakrifica individuale.
Problemi është a janë të gatshëm të pozicionohen ajo shumicë kolegësh që (megjithë respektin), janë aq të frustruar nga oligarkia që drejton mediat kryesore, saqë edhe për tu organizuar në një situatë të tillë dramatike për të ardhmen e fjalës së tyre, më përpara duhet të testojnë humorin e pronarit.
Gazetarët dhe aktivistët e shoqërisë civile kanë thërritur paraditen e sotme një protestë përpara Kuvendit, ndërsa nuk dihet ende nëse do të ketë një përshkallëzim të saj deri në grevë urie”, shkruan Kopliku.
