Të qenurit futbollist me famë nuk ka vetëm anë të mira. Këtë fakt e tregon dhe historia e një kampioni si Wayne Rooney. Ish-sulmuesi i Manchester United, foli për problemet e tij personale në një intervistë të gjatë dhënë për “Daily Mail”. Anglezi pranoi vështirësitë që kishte hasur në menaxhimin e presionit.
Rooney, vetëm 16 vjeç ishte bërë lojtar i Premier League: “Kam lindur dhe jam rritur pa rehati në një zonë të klasës punëtore të Croxteth. Nëna dhe babai im nuk kishin kurrë shumë para. Gjithmonë kisha debate me ta, duke parë nënën time t’i shkatërronte gjërat. Unë u katapultova në elitën e Premier League në moshën 16-vjeçare.
Përjetova një dimension ndërkombëtar. Nuk isha i përgatitur, nuk ndihesha rehat. Të jesh futbollist ka edhe një anë tjetër të medaljes, që nuk e dija. M’u desh shumë kohë të përballesha me ankthin dhe presionin. Vitet e hershme te Manchester United, ndoshta derisa erdhi në jetë fëmija im i parë, Kai, me të vërtetë u mbylla në vetvete. Nuk dola kurrë”.
Ky ishte presion i padurueshëm për një djalë si Wayne: “Kam krijuar kaq shumë zemërim. Presioni për të luajtur te Manchester United dhe Anglinë, për të fituar vazhdimisht e ndikoi jetën time. Në përpjekje për t’u përballur me gjithçka, ndonjëherë mendoja se zgjidhja ideale do të ishte mbyllja në vetvete duke pirë për dy ditë.
Kurrë nuk i kam ndarë ndjenjat dhe problemet e mia me djemtë në dhomën e zhveshjes apo edhe me Sir Alex. Gjithashtu, sepse nuk isha i qartë në kokën time, më dha atë paparashikueshmëri shtesë në lojë”.
Një ankth që e shtyu të bënte disa gabime: “Kam bërë shumë gabime kur isha i ri, disa përfunduan në shtyp dhe disa jo. Shpesh ato ishin zënka ose akte të lidhura me menaxhimin emocional. Unë kam qenë gjithmonë i zemëruar. Në atë masë sa në një sfidë me Chelsea, që vlente sezonin e Premier League, vendosa t’i ndryshoja takat (këpucët) e mia.
Përdorja një palë me thumba më të gjatë për të lënduar dikë. Kisha disa probleme të vetëkontrollit dhe i zgjidha ato. Mësova se i ndjeja ato lloj momentesh që po vinin, sikur po afrohej një shpërthim. Edhe gruaja ime u mësua me këtë situatë timen. Kur i dërgoj të gjithë në ferr dhe largohem, bëj gabime të trasha”.
Dëshmi se fama, nëse nuk menaxhohet mirë, mund të jetë një faktor veçanërisht negativ…
