Ambasada e SHBA në Tiranë, ka reaguar mbi ankimimin në Gjykatën Kushtetuese të Vettingut, ku thekson se populli shqiptar duhet të shqetësohet nga përpjekjet për të dobësuar reformën në drejtësi
Ambasada e SHBA-ve tha se ky institucion duhet të shqyrtojë ankesën në mënyrë transparente dhe mbështetur në rekomandimet e Komisionit të Venecias.
Deklarata e plotë
Mbështesim deklaratat në mbështetje të reformës në drejtësi nga udhëheqësit e tri partive politike më të mëdha në vend.
Ata kanë të drejtë kur thonë se reforma në drejtësi do të ecë përpara, por populli shqiptar duhet të shqetësohet nga përpjekjet për të dobësuar reformën, për të mbrojtur gjykatës dhe prokurorë të korruptuar, përfshirë ata që kanë lidhje me krimin e organizuar.
Vetingu duhet të jetë i fortë dhe kuptimplotë, sepse elementët kryesorë anti-korrupsion të reformës, përfshirë SPAK-un dhe BKH-në, varen nga gjykatës dhe prokurorë të ndershëm.
Ne nxisim Gjykatën Kushtetuese që të shqyrtojë ankesat në mënyrë të hapur dhe transparente, duke u mbështetur në rekomandimet e Komisionit të Venecias. Ne përgëzojmë qytetarët shqiptarë, shoqërinë civile dhe median e pavarur, që vazhdojnë të jenë syhapur që njerëzit e korruptuar të mos ua vjedhin demokracinë e tyre.
