Aleanca për Mbrojtjen e Teatrit vijon me denoncimet ndaj qeverisë dhe kryetarit të Bashkisë Erion Veliaj. Juristja e AMT, Adriana Kalaja tha sot para mediave se padia e tyre në Prokurorinë e Tiranës ndaj Shkëlqim Fushës dhe Arbër Maznikut, ende nuk është shqyrtuar dhe se për këtë do i drejtohen institucioneve të tjera ligjore.
Kalaja theksoi se çështja nuk është marrë në shqyrtim pasi ka urdhër politik nga Rama, Basha apo Veliaj, duke shtuar se edhe çështja e dosjes ‘Babale’ nuk po shqyrtohet ende.
“Ne informojmë se lidhur me vendimin e Gjykatës për personat a akuzuar për korrupsion, ne kemi bërë ankim pranë kësaj gjykate që po shkojmë në dy vite tashmë dhe na habit fakti që kjo çështje nuk po gjykohet akoma. Si çështje penale duhej gjykuar tashmë sepse këta persona kanë ndikuar me vendime korruptive në buxhetin e shtetit, ata duhet të ishin sot në SPAK por këta dy shtetas vazhdojnë të lirë njëri si nënkryetar i Bashkisë Tiranë ndërsa tjetri duke përfituar tendera. Është edhe çështja e dosjes ‘Babale’, në ngarkim të deputetit Ervin Salianji. Keto dosje nuk lëvizin me urdhër politik, të Ramës dhe Bashës por nuk shqetësohemi, presim 2 apo 12 vjet.
Kujtojmë se AMT kallëzoi në Prokurori 2 vite më parë nënkryetarin e Bashkisë së Tiranës Arbër Mazniku dhe biznesmenin Shkëlqim Fusha, për shkak të pagimit të shpenzimeve të udhëtimeve për zyrtarin e Bashkisë.
