Paralelja e hequr nga ambasadori i Rusisë në OKB, Vasily Nebenzya, se ajo që po ndodh në Ukrainë nuk është asgjë më shumë se ajo çfarë ka ndodhur më herët në Kosovë dhe fajësimi i Perëndimit se po ndjek standarde të dyfishta për rastin e Ukrainës ka shkaktuar replika të forta të ambasadorit të Shqipërisë në OKB, Ferit Hoxha.
Në mbledhjen radhës së Këshillit të Sigurimit të OKB-së që u mbajt në Nju Jork, Nebenzya tha po ashtu se nuk është e drejtë t’i bëhet presion Serbisë që të vendosë sanksione ndaj Rusisë me të cilën ka marrëdhënie historike.
“Duke i refuzuar banorëve të Donbasit në territoret e çliruara të Ukrainës, të drejtën për vetëvendosje, delegacionet perëndimore po demonstrojnë standardet e tyre të dyfishta skandaloze. Kritikët më të zëshëm të referendumit në Donbas e Zaporozhia ishin dikur të parët në mbështetje të pavarësisë së Kosovës.
Pastaj deklaruan se territori kishte të drejtë të shkëputej nga shteti serb nëse ekzistonte një kërcënim real që të drejtat e shqiptarëve të Kosovës do të cenoheshin rëndë nga e ashtuquajtura vazhdimësi korrigjuese… Në Kosovë absolutisht nuk ka pasur referendum, nuk ka vota të lira të popujve atje.
Ka qenë vetëm një shpallje e pavarësisë, e miratuar nga autoritetet e përkohshme vetëqeverisëse që tejkaluan kompetencat e tyre. Në atë kohë kjo ishte e mjaftueshme që Perëndimi të njihte pavarësinë e Kosovës dhe konfirmoi se e drejta ndërkombëtare nuk e pengonte atë të shpallte pavarësinë e saj.”
I menjëhershëm ishte reagimi i Ambasadorit Hoxha, i cili e quajti si krejtësisht të gabuar një krahasim të tillë të diplomatit rus.
“Delegacioni rus hoqi përsëri një paralele me Republikën e Kosovës, një vend i pavarur që është njohur nga gjysma e Kombeve të Bashkuara duke përfshirë gjysmën e këtij këshilli, pra kjo është e gabuar, e pasaktë dhe për të ardhur keq.
Asgjë nuk mund të jetë më artificiale dhe e detyruar sesa krahasimi i përpjekjeve ndërkombëtare për t’i dhënë fund konfliktit, për të mbrojtur civilët dhe për të vendosur një proces paqeje, për të gjetur një zgjidhje të qëndrueshme siç ishte rasti i Kosovës, me agresionin e pastër dhe të paprovokuar dhe referendumin që po mbahet tani në Ukrainë.
Askush nuk mund të mashtrohet nga kjo, askush nuk tenton të krahasojë të pakrahasueshmen, asnjë rrugë e shkurtër nga konteksti historik dhe politik nuk do ta ndihmojë Rusinë të largojë vëmendjen nga lufta e saj në Ukrainë.”
Ndërkaq Parlamenti Evropian pritet të kërkojë që vazhdimi i bisedimeve të anëtarësimit mes Serbisë dhe Bashkimit Evropian të kushtëzohet me vendosjen e sanksioneve nga Beogradi ndaj Rusisë.
