Ambasadori i Shqipërisë në Greqi, Dashnor Dervishi, ka bërë të ditur se pala shqiptare është vënë në kontakte me policinë greke për të marrë më shumë informacione lidhur me atë çfarë i ka ndodhur 29-vjeçarit shqiptar.
Dervishi ka deklaruar se e gjithë skena është filmuar nga kamera e sigurisë që ndodhet në dhomën ku ka ndodhur ngjarja, pamjet e të cilës ata ia kanë kërkuar autoriteteve greke, por që u është thënë se do t’u vihen në dispozicion në një moment tjetër, pasi ngjarja është ende në hetim – raporton Top Channel.
Për këtë ngjarje ka reaguar edhe Avokati i Popullit z. Igli Totozani, i cili i është drejtuar homologut të tij grek, z. Andreas Pottakis, të cilit i kërkon nëpërmjet një letre zyrtare, të ndërhyjë me kompetencat që i jep ligji në mbrojtje të të drejtave dhe lirive të njeriut, për nxitjen e institucioneve shtetërore në zbardhjen e së vërtetës dhe shkaqeve që çuan në vdekjen e të riut shqiptar, z. Pëllumb Nikoll Marknikollaj.
“Në respekt të familjes së të ndjerit dhe opinionit publik në Shqipëri, ta ndiqni këtë rast edhe në kuadër të kompetencave si mekanizëm kombëtar i parandalimit të torturës, i cili shqyrton veprimet dhe mosveprimet e organeve të policisë në respektim të të drejtave dhe të garancive të personave të privuar nga liria”, shkruan z. Totozani në letrën drejtuar homologut të tij grek z. Pottakis.
Gjithashtu Totozani i ka dërguar edhe një shkresë zyrtare Ministrisë së Jashtme Shqiptare ku i kërkon informacione mbi hapat që po ndërrmerr ky institucion lidhur me zbardhjen e rrethanave dhe përgjegjësve që shkaktuan vdekjen e shqiptarit Pëllumb Nikoll Marknikollaj në rajonin e Policisë Kato Patisia, në Greqi.
