Ndërtimi i këndeve të lojrave dhe hapësirave çlodhëse në Tiranë është vlerësuar edhe nga përfaqësitë diplomatike në vendin tonë, një prej të cilave ka dhuruar module lojëra për këndin te sheshi “Bajram Curri”.
“Më vjen mirë që ambasada e parë që i bashkohet projektit tonë për këndet e lodrave është Ambasada Çeke. Ky është këndi ynë i 21 në dy vjet, por do të vazhdojmë edhe për dy vitet e tjera që na kanë mbetur”, tha Veliaj.
Ambasadori i Republikës Çeke e vlerësoi bashkëpunimin si mundësi për brezat e rinj. Jaroslav Ludva deklaroi: “Kjo ditë është një ditë e bukur për të dy palët, bashkinë, qytetin dhe Ambasadën Çeke. Ne identifikuam këtë bashkëpunim shumë të mirë me bashkinë, që konsiston në këtë shesh lojërash që nxjerr në pah të ardhmen e brezave dhe të ardhmen e qytetit të Tiranës. Jemi shumë të lumtur që po bashkëpunojmë në këtë projekt. Të shpresojmë që edhe ambasada të tjera të na bashkohen në këto projekte”.
Veliaj tha se këto investime u shërbejnë jo vetëm fëmijëve, por edhe gjeneratës së ardhshme.
