Kampi ku ndodhet vogëlushi shqiptar Alvin Berisha në Al-Hol të Sirisë nuk është marrë nga forcat e ISIS-it.
Taulant Kopliku, gazetari që publikoi dhe ka ndjekur historinë e dhimbshme të 11-vjeçarit të braktisur në Siri rrëfen se në kamp ka patur vazhdimisht vrasje dhe përplasje midis grupeve të ndryshme, por nuk është e vërtetë sipas tij, që një grup luftëtarësh i ISIS-it ka marrë nën kontrollin kampin në fjalë.
Nga ana tjetër, Kopliku zbulon se djaloshi Alvin ndodhet në duart e sigurta të organizatës “Save the Children’’, e cila e ka raportuar se 11-vjeçari shqiptar nuk ka pësuar asgjë.
Mesazhi i Taulant Koplikut rreth Alvin Berishës dhe lajmit të marrjes së kampit nga ISIS-i:
Ka që dje që qarkullon ne mediat shqiptare ky lajm. Normal është shqetësues dhe merr vëmendjen e duhur nga opinioni i një vendi që ka shtetasit e tij (fëmijë) atje.
Por, fatmirësisht brenda lajmit te keq ka edhe lajme te mira. Në të vertete ka patur përplasje te vazhdueshme në kamp dhe kjo ka ndodhur edhe para ndërhyrjes turke. Djegia e çadrave, vrasjet me armë të ftohta apo dhuna mes grupeve dhe etnive kanë qenë prezente rregullisht në kamp. Kjo nuk do të thotë se ISIS mori kontrollin e Al-Hol.
Për të hyrë në temë. Sapo u informova nga vullnetarët e “Save The Children’’ në kamp. Edhe sot ata e kanë kontaktuar Alvinin i cili është nën kujdesin e kësaj organizate. Në sektorin ku ndodhet i vogli, nuk ka as më të voglin problem nga ata që po shkruhen në media.
Kam bindjen se shumë shpejt do kemi lajme te mira.
