Alpinisti shqiptar Flori Haçkaj ka refuzuar ftesën e kryeministrit Edi Rama për të marrë pjesë në samitin e diasporës.
Ai sqaron se duhet ta bojkotojë mbledbjen e dytë të shqiptarëve të diasporës, duke u shprehur se ndjen neveri për këtë qasje kaq të padrejtë ndaj shqiptarëve në përgjithësi dhe diasporës në veçanti.
Reagimi i Flori Haçkajt:
Pas samitit të parë të diasporës, i cili ishte “shumë i suksesshëm” në biznesin dhe lidhjet e gjeneruara midis shqiptarëve nëpër botë…lideri suprem, vendos të mbajë samitin e dytë.
Me një shqipe të kulluar dhe një ftesë pa datë, i madhi na fton në “kuvendin e madh të Lezhës të 2019”. Shpresoj që autografët e tij në librin “Kurban” si dhe ndonjë pikturë e të madhit të jenë pjese thlebësore e samitit.
Përtej shakave, falenderoj Ambasadën Shqiptare në Bernë që më ftoi, por për shkak te keqqeverisjes me duhet të bojkotoj këtë mbledhje të dytë.
Nuk pranoj të bëhem pjesë e fasadës së qeverisë, qe dëshiron ta shesë këtë takim si një përjekje të saj në bashkimin e shqiptarëve si dhe ta përdorë këtë takim për të gjeneruar fonde pa fund, në përgatitjen e samitit, ku dihet që përfituesit do jenë disa njerëz të afërt të qeverisë me reklamat, biletat e transportin në përgjithësi, printimet, kateringun etj, si dhe entiteti privat që përfitoi të dhënat e të gjithë pjesëmarrësve të samitit të parë dhe i përdori ato për interes personal, ndërkohë që samiti ishte i thirrur nga qeveria dhe pjesëmarrësit morën pjesë me kostot e tyre.
Neveri për këtë qasje kaq të padrejtë ndaj shqiptarëve në përgjithësi dhe diasporës në veçanti.
