Besohej se ishte një “bast i sigurt” fitorja e Barcelonës ndaj modestëve të Almerias, për më tepër nga ecuria e klubit nga veri-lindja e Spanjës, megjithatë, futbolli na tregoi se topi është i rrumbullakët, duke bërë kështu që të gjithë, nga mediat deri te tifozët dhe lojtarët, të zbresin me këmbë në tokë.
Barcelona u “thye” në transfertën andaluze me rezultatin 1-0. Për Almerian, ishte triumfi i parë në histori përballë “blaugranave”, duke shënuar kështu një ditë speciale. Nga ana tjetër, të besuarit e trajnerit Xavi Hernandez nuk patën energjinë e duhur ndërsa pas kësaj humbje dështuan edhe të rrisnin diferencën e pikëve nga Real Madridi ndjekës teksa tashmë “Los Blancos” janë në -7.
Nga ana tjetër, skuadra e Xavit regjistroi edhe një rekord negativ duke qenë se për herë të parë nga tetori i vitit 2022, Robert Lewandowski me shokë nuk mundën të gjenin rrugën e rrjetës. Për herë të fundit kur katalanasit dështonin të shënonin gol, ishte ndeshja e 26 tetorit në Champions League përballë Bayern Munich (0-3) në Camp Nou.
Takimi i fundit në La Liga, ku Barça nuk kishte gjetur rrjetën ishte kundër Rayo Vallecanos, në javën e parë të kampionatit.
