Nënkryetari i Partisë Demokratike, Enkelejd Alibeaj në mbledhjen e Komisionit të Ligjeve ka kundërshtuar ligjin për vettingun e noterëve, i cili u prezantua sot nga ministri i Drejtësisë, Ulsi Manja. Gjatë fjalës së tij, Alibeaj tha se noterët duhet të kontrollohen, por s’ka nevojë për vetting. Sipas tij maxhoranca po përpiqet të pastrojë noterët dhe ta mbushë me militantë të saj. Më tutje ai vuri theksin te vettingu në politikë, duke e cilësuar si zgjidhjen e vetme. Sipas tij, janë politikanët ata që po bëjnë gjëmën më të rrezikshëm se noterët dhe gjykatësit.
“Noterët janë thjeshtë ata që ju vjen dikush te zyra me një kontratë dhe janë kontrolluar. Prandaj testi moral është i pari që duhet të kalojë gjithsecili prej nesh. Pranoni vettingun në politikë dhe s’ka për të ndodhur as pastrim parash dhe s’ka për të shkuar puna deri te noterët. Ky është testi që se kaloni dot. I pari është vettingu i politikanëve, këta bëjnë gjëmën, rrimë përkrah me kriminelët dhe bëjnë vota”, u shpreh ai. Kujtojmë se kreu i PD, Lulzim Basha ka qenë ai që ka kërkuar i pari vettingun në politikë, duke thënë se në filtrat e tij duhet të kalojë çdo politikan.
