Një ditë pas publikimit të përgjimeve nga gjermania “Bild”, ish-deputeti i PD Enkelejd Alibeaj tha para mediave se kur bëhet fjalë për pushtetin, Rama është i paparashikueshëm dhe nuk zhgënjen, pasi në vend të jepte dorëheqjen, po mbron Dakon dhe kërcënon.
“Pas skandalit të publikuar nga Bild ku del në dritë mekanizmi i blerjes së votave nëpërmjet krimit dhe drejtuesi i fushatës së PS është një trafikant droge të gjithë presin dorëheqjen e Edi Ramës por kur bëhet fjalë për mbajtjen e pushtetit, Rama është i paparashikueshëm dhe nuk zhgënjen asnjëherë, kryeministri i ardhur në pushtet me votat e krimit jo vetëm nuk po konsideron dorëheqjen, por është vënë në mbrojtje të Dakos duke kërcënuar këdo. Me apo pa dorëheqje, Ramën nuk e beson më askush. Edhe ata që besonin sado pak tek kryeministri mafioz, sot janë të qartë se gjithçka ka ndodhur me bekimin e tij. Nëse do ishte e kundërta Rama do kishte dhënë dorëheqjen me dhjetëra herë”, tha Alibeaj.
