Kreu i grupit parlamentar të Partisë Demokratike, Enkelejd Alibeaj i është kundërpërgjigjur deklaratës së deputetit Flamur Noka, i cili mohoi kategorikisht platformës e tij.
Alibeaj shkruan se Noka ndjek verbërisht udhëzimet e idhujve të tij, referuar këtu Berishës, ndërsa shton se 32 deputetët e platformës janë zëri i vërtetë i demokratëve dhe që duan bashkimin e partisë.
“Refuzimi i paralajmëruar i kërkesës së shumicës dërrmuese të Grupit Parlamentar për bashkim, vijimi me agjendën e parapërcaktuar si dhe mungesa e një reflektimi për situatën ku ndodhet sot PD është dëshmi e qartë e faktit se kujt grupim i interesojnë demokratët dhe kush priret të ndjekë verbazi udhëzimet e idhujve. 32 deputete te grupit parlamentar te PD janë jo vetëm vota por dhe zëri i demokrateve qe sot me shume se kurrë duan te ndalet procesi i përçarjes dhe te nise bashkimi i vërtetë. Jo me fjale por me vepra konkrete, në çdo qelize te partisë dhe jo vetëm ne zyrat e selisë qendrore.
Deputetët e PD duhet ti shërbejnë vetëm interesit të demokratëve dhe interesi i tyre është bashkimi dhe forcimi i PD. Koha për të ndalur rrugën e përçarjes që i shërben vetëm Edi Ramës është tani. Koha për të treguar maturi dhe përgjegjshmëri është tani”, shprehet Alibeaj.
Më herët, Noka doli kundër platformës së Alibeajt duke thënë se “Rithemelimi” është i gatshëm të verifikojë çdo procedurë të Kuvendit, por në asnjë mënyrë nuk do lejojë shtyrjen e tij.
