Trajneri i Juventusit, Masimiliano Alegri, është shfaqur i qetë në konferencë për shtyp para ndeshjes me Napolin.
Ai tha se kjo ndeshje nuk do të jetë vendimtare për fatet e kampionatit.
“Rezultati i ndeshjes Juventus-Napoli nuk do të vendosë kampionatin.
Pas kësaj ndeshje dy skuadrat kanë edhe 39 pikë në dispozicion.
Napoli po zhvillon një kampionat të madh, ndërsa ne kemi grumbulluar vetëm 3 pikë më pas se sezonin e kaluar. Diferencën po e bën dueli direkt i fazës së parë, ku pësuam dy gola për fajin tonë.
Tani do të jetë një ndeshje e ndryshme, një sfidë e bukur, taktike dhe teknike. Është një përballje që i ka të tre rezultatet”, tha trajneri i bardhezinjve .
Ai u shpreh se fitorja për të pestin vit radhazi i kampionatit nga ana e Juventusit, do të ishte diçka historike.
Kjo, duke parë edhe faktin se sa keq e nisi Juventusi kampionatin.
Ndërkohë, Alegri hodhi poshtë spekulimet se sezonin e ardhshëm do të shkojë tek Çelsi, duke thënë se është i përqendruar vetëm tek Juventusi dhe se nuk ka asgjë të vërtetë në lidhje me kalimin e tij në Angli.
