Aleanca për Mbrojtjen e Teatrit Kombëtar kanë depozituar ditën e sotme një padi penale në SPAK kundër ministrit të Brendshëm Sandër Lleshaj, drejtorit të Policisë së Shtetit Ardi Veliu dhe kryebashkiakut Erion Veliaj pasi sipas tyre kanë kryer veprën penale “Vrasje të mbetur në tentativë” mëngjesin e 17 Majit.
Regjisori Robert Budina deklaroi se dosja e dërguar në SPAK do të përkthehet dhe do të dërgohet për hetim ndërkombëtar.
“Ne presim të fillojë hetimet dhe këtë dosje do ta përkthejmë dhe do e çojmë për hetim ndërkombëtar. Ne u sulmuam nga RENEA dhe nuk ka asnjë përgjegjësi. Patë gjë ndonjë dhunë nga ne. Automatik në kokë, si ta vërtetoj unë këtë në mes të errësirës. Është fjala ime kundër atij ministrit. Ne si përfaqësues të mbrojtjes së Teatrit këtë mund të bëjmë. Ku janë të tjerët, pse vetëm ne dalim këtu. Ku është pjesa e shëndoshë e kësaj shoqërie. Kemi qëllim vetëm të rikthejmë tempullin e Teatrit. Ky pushtet thotë se ka votat e shumicës dhe ju shemb juve. Ne duhet të vërtetojmë se e gjejmë të drejtën tonë. Unë besoj në punën tuaj dhe keni rrezikuar bashkë me ne. Hajde ta fitojmë këtë betejë”, u shpreh Budina.
