Nga Zenepe Luka
Këngëtari Italian, që prej një viti edhe shtetas shqiptar dhe banor i lagjes “Pavarësia” në Vlorë, ka ndjekur me shqetësim lajmet që flasin për përmbytje në Shqipëri dhe veçanërisht në Vlorë. Sado që ndodhet jashtë Italisë, i shqetësuar, ka nisur një sms , si rrallë herë, në komunikimin e tij.
Vonesa e përgjigjes në celularin e tij, kjo për shkak të mungesës së energjisë, e ka detyruar Al Banon të telefonojë dhe të marrë informacionin e duhur për situatën e krijuar nga shirat në Shqipëri. Gjatë telefonatës i është dhënë kjo përgjigje.
“Të falënderojmë nga zemra për interesimin tuaj. Kjo tregon lidhjet shpirtërore që keni me shqiptarët dhe veçanërisht me Vlorën. Po, është e vërtetë se janë krijuar vështirësi,nga shirat e shumta dhe cikloni që pushtoi Vlorën, por situata është e përballuar pa humbje njerëzore. Institucionet e shtetit shqiptar, bashkia dhe Prefektura në Vlorë, janë në gatishmëri dhe po gjenden pranë njerëzve, që kanë nevojë në këtë emergjencë të krijuar.”
Pyetjes se përse është përmendur “Al Bano dhe Romina” në kronikë në një televizion, iu përgjigja:
“Bëhet fjalë për zonën ku ndodhet klubi i fansave “Al Bano dhe Romina Paur”, ku është krijuar shoqata më 31 janar të vitit 1996, që është mbuluar nga ujërat. Prej kohësh, ky emërtim është shndërruar në një toponim dhe vlonjatët saktësojnë vendin, lagjen.”
Al Bano përpos shqetësimit, nuk mungon të shprehë emocionet e tij për vizitën në Vlorë, që bëri një vit më parë 29- 30 nëntor 2016, vizitën tek varrezat e dëshmorëve, takimi në Kinoteatrin e qytetit, vendosjen e një buqete me lule tek Memoriali i Pavarësisë, vizita në maternitetin e Vlorës, ditën që lindi një foshnjë dhe prindërit i vendosën emrin Albano etj.
-Kam shumë mall- thotë ai në fund të bisedës, shpresoj se së shpejti do të jem për një vizitë kortezie tek Presidenti Ilir Meta dhe kryeministri Edi Rama, ndërsa në muajin prill të vitit të ardhshëm, të realizojmë ëndrrën e përbashkët, për të dhënë një koncert në Sarandë.
Me një foto në Vlorën e përmbytur, përfundojmë edhe rreshtat e këtij shkrimi, ku edhe njëherë, sikurse gjatë 24 vjetëve miqësi me këngëtarin e shquar Albano Carrisi.
Ai tregon dashuri të veçantë për Shqipërinë dhe shqiptarët, në themel të secilës është dashuria dhe mirënjohja e atit të tij, Karmelo Karrisi, ish ushtar i luftës së dytë botërore, në Sarandë, që në vend të urrejtjes, mbolli dashurinë për shqiptarët, që ua përcolli edhe dy djemve të tij.
http://www.gazetadita.al/albano-carrisi-i-shqetesuar-per-situaten-ne-vlore/
