Kapiteni i Partizanit, Alban Hoxha, ka folur për mediat në prag të ndeshjes me Vllazninë.
Ai ka thënë se të kuqve nuk iu lejohen më hapa falsë, pas barazimit me Flamurtarin, që iu kushtoi edhe humbjen e kreut.
Në lidhje me Vllazninë, Hoxha ka thënë se duhet përqendrim maksimal, pasi ekipi shkodran është kthyer në një “mace të zezë” për të kuqtë.
Tashmë ju duhet patjetër të fitoni, sepse “agjëroni” në këtë drejtim që në fund të nëntorit të vitit të kaluar…
Eshtë e vërtetë, na duhet se nuk bën fitorja. Vllaznia për ne ka qenë kundërshtar shumë i vështirë këto vitet e fundit. Na është bërë si “macja e zezë”. Kemi bërë gabime, shumë mendoj, që s’duheshin bërë. Që të dalësh kampion, gabimet duhet të jenë të sa më të pakta. Që në këtë ndeshje duhet t’i minimizojmë gabimet dhe të vazhdojmë garën për titull. Përndryshe, do ta kemi shumë të vështirë, sepse tani fillon “malorja” e kampionatit.
Një fitore në 6 ndeshjet e fundit duket pak për një skuadër që pretendon titullin. Pra, në Shkodër do të jetë “jetë a vdekje” për ju?
Po, është e vërtetë. Na duhet se nuk bën fitorja në Shkodër, nëse duam të ruajmë vendin ku jemi. Thënë ndryshe, titulli kalon edhe nga kjo transfertë. Nëse ndodh ndryshe, titulli bëhet akoma më i vështirë, jo se shuhen shanset përfundimisht.
A është rritur presioni mbi skuadrën pas barazimit me Flamurtarin, që u shoqërua edhe me humbjen e kreut?
Nuk mund të them presion, nga lart, nga presidenca apo drejtuesit. Kjo gjë ndodh vetvetiu kur nuk merr rezultatin që duhet. Natyrisht, duhet të kemi më shumë sedër dhe ego për të arritur ato që kërkojmë. Megjithatë, ne jemi të qetë. Nuk është se kemi ndonjë presion të madh dhe ndeshjen ndaj Vllaznisë po e presim me qetësi.
Në ndeshjet e fundit keni pësuar 4 gola. A është ky një problem i të gjitha reparteve te Partizani, apo nuk po funksionon mbrojtja?
Mendoj se kur pëson gol, gjithçka fillon edhe nga sulmi, sikurse edhe kur shënon. Kemi pësuar vërtet gola ndeshjet e fundit, çka mund të jetë përgjegjësi e të gjithë reparteve, por edhe kemi shpërdoruar shumë. Kjo na ka penalizuar. Kemi humbur raste pa fund. Nëse do t’i kishim finalizuar me sukses ato, do të ishim më lart se jemi.
I trembeni Vllaznisë, që pas merkatos së janarit është organizuar më shumë?
Nuk i trembemi asnjë ekipi, por e respektojmë për atë që po bën. Vllaznia është ekip i fortë, luan futboll të bukur si brenda dhe jashtë fushe. Megjithatë, nuk i frikësohemi. E respektojmë për emrin që ka.
Luani në “Reshit Rusi”, një fushë sportive….
Ne jemi mësuar të luajmë në “Qemal Stafa”, ndaj fushat e vogla na bëjnë pak përshtypje. E kemi pak të vështirë të ambientohemi. Megjithatë, ky faktor nuk ndikon në rezultat. Vështirësinë e ka brenda, patjetër. Ato shkallët që janë shumë afër, fusha e vogël dhe bari sintetik do të jenë pengesë për ne.
Si e patë ndeshjen që barazuat me Flamurtarin?
Pashë një Flamurtar që u mbrojt gjithë kohën. Ndryshe nga sa thonë analistët, që ka luajtur shumë mirë, unë kam mendim tjetër. Nëse do të kishim shfrytëzuar rastet që krijuam, patjetër do të fitonim. Kemi shpërdoruar 4 apo 5 raste të pastra. Unë e pashë Partizanin shumë mirë në atë ndeshje. Eshtë ajo që thashë pak më parë, na mungoi finalizimi. Nëse rastet do të ishin kthyer në gola, do të flisnim ndryshe. Vetëm një rast kishte Flamurtari, që bëri gol, vetëm kaq.
Mos është një periudhë tranzicioni kjo për Partizanin, duke parë se të ardhurit e janarit nuk kanë dhënë ende sa pritej?
Blerjet e janarit duan pak kohë sa të ingranohen në skuadër dhe të ambientohen me kampionatin shqiptar. Megjithatë, besoj se kanë filluar të përshtaten dhe kjo do të duket pas 2-3 ndeshjesh. Ne kemi bërë me të vërtetë afrime cilësore, edhe pse pakkush i ka quajtur kështu. Do të shohim në vazhdim sa vlen gjithsecili prej tyre.
