Një aksident tragjik i ndodhur në orët e para të mëngjesit në Lushnjë i ka marrë jetën një 43-vjeçari. Viktima, Ernis Xhumari, humbi jetën pasi automjeti që drejtonte u përfshi në një aksident në zonën e njohur si “Rrethrrotullimi i Plasmasit”.
Sipas informacioneve paraprake nga policia, rreth orës 01:45 kamerat e sigurisë kanë konstatuar një automjet tip “Mercedes-Benz” duke kryer manovra të rrezikshme përpara Komisariatit të Policisë Lushnjë. Më pas, drejtuesi ka dalë nga mjeti dhe ka bërtitur disa herë para godinës së komisariatit.
Pas njoftimit të patrullës së policisë për të verifikuar situatën, 43-vjeçari është larguar me shpejtësi të lartë sapo ka vënë re efektivët që po afroheshin. Vetëm pak minuta më vonë, ai dyshohet se ka humbur kontrollin e automjetit për shkak të shpejtësisë së madhe.
Mjeti fillimisht është përplasur me bordurat anësore të rrethrrotullimit, më pas me një shtyllë ndriçimi dhe ka përfunduar i përmbysur disa metra më tej. Për pasojë, Ernis Xhumari ka ndërruar jetë në vendngjarje.
Viktima rezulton të jetë vëllai i zv.ministres së Mjedisit, Elda Xhumari. Burime bëjnë me dije se ai ishte arrestuar më parë për drejtim automjeti në gjendje të dehur, por kishte shmangur pezullimin e lejes së drejtimit duke paguar dyfishin e masës administrative.
Nën drejtimin e Prokurorisë, grupi hetimor vijon punën për të sqaruar plotësisht rrethanat dhe shkaqet e aksidentit fatal.
