Dy aksidente janë regjistruar pasditen e sotme në Milot dhe Prrenjas, ndërsa bilanci është tetë persona të plagosur, gjashtë jashtë rrezikut dhe dy në gjendje të rëndë. Aksidenti i parë u shënua në kryqëzimin e Milotit pasditen e sotme ku janë përplasur dy makina, ndërsa gjashtë persona raportohet se kanë mbetur të lënduar, katër ndodhen jashtë rrezikut në spitalin e Laçit, dy u dërguan në Tiranë në Spitalin e Traumës. Policia ka mbërritur në vendin e ngjarjes për të nisur hetimet për shkaqet e aksidentit.
Ndërkohë aksidenti i dytë u shënua në aksin Prrenjas-Librazhd në fshatin Katjel. Sipas policisë, një 65 vjeçar banues në Velçan të Pogradecit duke drejtuar mjetin tip “Benz” me targa AA475GR, është përplasur me mjetin me targa AA 316LN me drejtues një 40-vjeçar nga Katjeli. Si pasojë janë dëmtuar lehtë të dy drejtuesit e mjeteve, të cilët janë dërguar në Spitalin e Prrenjasit dhe janë jashtë rrezikut për jetën. Grupi hetimor ndodhet në vendngjarje dhe po punon për zbardhjen e shkakut të aksidentit.
