Nënkryetari i Partisë Demokratike, Enkelejd Alibeaj ka reaguar ndaj protestës së thirrur nga ish-kryedemokrati Sali Berisha, teksa në selinë blu tensionet po shtohen nga mbështetësit e këtij të fundit. Ai është shprehur se Berisha po i nxit demokratët për t’u përplasur me njëri-tjetrin, pasi ai do dhunë dhe gjak.
“Sali Berisha do dhunë dhe gjak. Nxit demokratët të përplasen me njëri-tjetrin dhe vetë është fshehur”, ka thënë Alibeaj.
Alibeaj e ka konsideruar të turpshme situatën e krijuar në selinë blu nga mbështetësit e Berishës, teksa shton se ai dhunon këdo që nuk mendon njësoj me të.
“Turp! Kjo është fytyra e vërtetë e Sali Berishës. Të dhunojë këdo që nuk mendon si ai!”, shkruan nënkryetari i PD-së.
Enkelejd Alibeaj është marrë nën mbrojtjen e gardës për shkak të pozitës së tij, ku parashikohet nga ligji që të mbahet nën mbrojtje për t’i ofruar siguri. Marrja nën mbrojtjen e gardës ishte me pikëpyetje për nënkryetarin e PD-së, por pas paralajmërimeve nga deputeti i PD-së Spartak Braho, që Alibeajt i rrezikohet jeta, ai u mor automatikisht në mbrojtje. Në të njëjtën kohë mbështetësit e Berishës ende pa nisur protesta janë shfaqur të dhunshëm në dyert e selisë ku kanë sulmuar fizikisht deputetin e PD-së, Roland Bejkon.
