Maqedonia e Veriut duke filluar nga data 1 shtator do të fusë në fuqi një paketë masash në tentativë për të ulur konsumin e energjisë elektrike pas krizës që ka përfshirë të gjithë Europën.
Ndërkohë një nga masat e propozuara sot nga Konfederata e Sindikatave të lira është edhe që sektori publik të punojë dy orë më pak, nga ora 9 e mëngjesit deri në 15:00, kur ka më shumë dritë dhe kur është më nxehtë gjatë ditës.
Siç ka paralajmëruar sot kryetari i KSL-së, Bllagoja Ralpovski, energjia që do të kursehet nga institucionet publike më pas duhet t’i jepet si ndihmë sektorit afarist dhe ndërmarrjeve publike për të parandaluar goditjet e mëdha të çmimeve.
“Mund të bëhet racionalizimi, sektori publik mund të punojë me orar të reduktuar prej dy orësh, që do të kursejë sasi të mëdha të energjisë elektrike. Mund të krijohen ekipe kujdestare që do të kryejnë aktivitetet e nevojshme gjatë një dite”, theksoi Ralpovski.
