Apeli i Gjykatës së Tiranës ka lënë në burg 4 zyrtarët që u përfshinë në abuzimin me tenderin e laboratorit të sigurisë ushqimore në Universitetin Bujqësor të Tiranës. Të katërt akuzohen për abuzim me paratë publike dhe manipulim të vlerave të pajisjeve nëpërmjet tenderit.
Në burg mbetën: Ali Rasha, Drejtor i Fermës Didaktike Eksperimentale; Tahir Ballgjini, Përgjegjës i Sektorit të Bujqësisë; Rushit Suna, Specialist i sektorit të bujqësisë; Ahmet Mejdani, Magazinier në magazinën qendrore të UBT.
Sipas hetimeve të prokurorisë ata duhej të blinin pajisje për të ngritur laboratorin e sigurisë ushqimore pranë fermës së Universitetit Bujqësor në Kamëz, por i 30-fishuan çmimet në mënyrë që të përfitonin. Në dosje rezultonte se një grirës frutash njohur si (blender) është blerë me paratë e Universitetit për 276 mijë lekë por në realitet kushton jo më tepër se 30 mijë lekë.
Fryrja e çmimeve për pajisjet u konstatua edhe në blerjen e këtij frigoriferi që shihni në foto, që shtetit i ka kushtuar afro 109 mijë lekë kur në treg kushton 30 mijë lekë. Pajisjet janë marrë në dorëzim me fatura të manipuluara në krahasim me vlerën e tregut. Zyrtarët publikë përcaktonin fituesin e tenderëve dhe kryenin hyrje-dalje fiktive të mallrave në magazina.
