Sonila Bitri, mjeke toksikologe pranë Spitalit Amerikan 2, e ftuar këtë të mërkurë në “Abc-ja e mëngjesit”, shpjegoi dëmet që mund të shkaktojë nëse teprohet me alkoolin.
Duke u ndalur te personat që kanë kaluar virusin, Dr. Sonila tha se dozat e larta të alkoolit mund të shkaktojnë më shumë dëme në organizëm.
“Nëse limitohemi deri në 100 mililitër çdo ditë, është konsumim normal i alkoolit. Një deri në 2 gota çdo ditë quhet konsumim normal. Problemi është kur konsumojmë në mënyrë kronike prej vitesh duke krijuar tolerancë. Dhe kur krijohet ky fenomen, që të arrijmë pikën e dehjes duhet një sasi e madhe por kemi bërë shumë dëme në organe. Mëlçia dhe truri janë organet target. Përveç alkoolit, kemi kombinim me drogëra të tjera kokaina. Për fat të keq, alkooli kombinohet shumë me kokainë, sidomos grupmoshat e reja. Nuk është se nuk të zë po ndryshon efektet. Nëse alkooli jep gjendje gjumi, pimë kokainë që të zgjohemi dhe kështu vazhdon.
U bënë dy vite pandemi, po shohim pacientë që e kanë kaluar virusin dhe janë në onsum alkooli. Vetë Covid dhe preparatet që janë konsumuar gjatë virusit, kanë ndikuar në organe. Konsumi i alkoolit shton më tepër dëmtimet që janë bërë në organe. Ndikon në imunitet, në sistemin nervor qendror, depresioni, ankthi mund të nxiten dhe përkeqësohen nën konsumin e alkoolit, prandaj duhet ta mendojmë mirë para se të konsumojmë doza të mëdha“, tha mjekja toksikologe e Spitalit Amerikan 2.
