Periudha e agjërimit për besimtarët myslimanë ka filluar dhe do të zgjasë deri në fund të këtij muaji. Por, duke qenë se këtë vit jemi në një situatë disi të pazakontë, një nga pyetjet më të shpesh, që është bërë gjatë pandemisë ka qenë, a ndikon vaksina anticovid tek agjërimi.
“Shëndeti është në radhë të parë. Një shëndet jo i mirë, bën që besimtari nuk mund të jetë komod për të mbajtur agjërimin. Për këtë arsye, shëndeti në radhë të parë dhe vaksinimi, që ne absolutisht që e sugjerojmë dhe u themi besimtarëve të vaksinohen, të ruajnë shëndetin e tyre dhe t’i përkushtohen agjërimit, sepse që të dyja shkojnë shumë mirë me njëra-tjetrën” tha Lauren Luli, Myftiu i Tiranës
Ndër të tjera ai tha se është vaksinuar me dy doza deri tani dhe po të jetë e nevojshme, patjetër që do të vazhdojë edhe me dozën e tretë. Referuar të dhënave të Ministrisë së Shëndetësisë, deri më tani, mbi 60% e popullatës ka marrë dozën e parë, ndërsa me tre doza janë rreth 12 %. Këshillat që japin vaksinatorët janë; në rast temperature një Takipirinë, ose Paracetamol. Të mos bëjnë dush, se mund të shkaktojë irritim. Jo aktivitete sportive, që të mos lodhin krahun. Të gjitha këto, për 24 orë.
