Pas shkrirjes së pakuptueshme të Ministrisë së Integrimit, është zgjedhur zëvendësministrja titullare që do të ndjekë procesin e integrimit të Shqipërisë në Bashkimin Europian.
Ajo është Artemis Dralo, minoritare greke, pjesë e listës së Partisë Socialiste në Gjirokastër. Megjithëse nuk ka fituar, ajo është dalluar për këtë post të rëndësishëm si pasuese e Majlinda Bregut apo e Klajda Gjoshës.
Artemis Dralo ka studiuar gjuhën angleze dhe e jep këtë lëndë në Universitetin “Eqerem Çabej”.
Ajo nuk ka përvojë dhe njohuri për procesin tejet të koklavitur të integrimit, por mësohet se flet anglisht në një nivel më të mirë se kryeministri i vendit.
Greqia kohët e fundit ka kërcënuar ta bllokojë procesin e integrimit për çështjen e pronave në Himarë. Ky emërim ndoshta do ta ngrohë Athinën, aq më shumë që “armiku” Edi Rama ngulmoi që të linte jashtë Kuvendit elementin kombëtar në politikën shqiptare.
