Korporata po shfrytëzon plotësisht reshjet e shumta
KESH po shfrytëzon në maksimum reshjet e bollshme të këtyre ditëve. Kjo po mundësohet duke i vënë në punë me kapacitet të plotë të tre hidrocentralet e kaskadës së Drinit.
Kjo ka bërë që sipas planit të KESH, deri më 10 mars të prodhohen 24 milionë kilovat për orë energji në ditë. Kjo sasi është plotësisht e mjaftueshme për konsumin ditor të vendit. Madje në fasha orare të caktuara ka edhe tepricë të energjisë elektrike të prodhuar. Për këtë arsye KESH po shet energji që nga muaji shkurt dhe deri më tani ka arkëtuar nga sasitë e shitura në 4 javët e fundit, mbi 4 milion euro.
Sipas të dhënave të publikuara nga KESH aktualisht në liqenin e hidrocentralit të Fierzës niveli i ujit është ngjitur në lartësinë 292.8 metër, duke qenë tre metra më shumë se në fund të muajit shkurt. Po kaq të larta janë rezervat edhe në Vaun e Dejës dhe Koman. Ndërkohë edhe prurjet në të tre basenet aktualisht janë të kënaqshme.
