Kapiteni i Holandës, Arjen Roben, i ka karikuar shokët e skuadrës që të mos i nënvlerësojnë aftësitë e tyre dhe të besojnë në potencialin për të mundur Francën mbrëmjen e sotme.
“Sigurisht që sa i përket cilësisë, Franca ka një skuadër shumë të mirë, por unë nuk dua të flas për ta. Ne nuk duhet të mendojmë se nuk jemi mjaftueshëm të fortë. Duhet të kemi besim në cilësitë tona dhe të besojmë se mund t’i mundim”, tha Roben.
“Unë jam gjithnjë optimist. Dakord, e pranojmë se do të jetë e vështirë, sepse Franca ka një skuadër më të mirë. Por nëse mendon kështu, atëherë më mirë qëndro në shtëpi dhe mos dil fare në fushë”, shtoi asi i Bajernit.
“Tulipanët” renditen në vendin e tretë në Grupin A, tre pikë pas bashkëkryesuesve të Francës dhe Suedisë dhe një humbje e dytë ndaj skuadrës së Deshampit, mund t’i shuante përfundimisht shpresat e tyre për një vend në finalet e Botërorit të Rusisë verën e ardhshme.
