Nikoll Lesi, botuesi i gazetës “Koha Jonë”,është shoqëruar në policinë e Tiranës pasditen e djeshme.
Një shkalle metalike në godinën ku është vendosur redaksia, leja e së cilës dyshohej, ka qenë arsyeja e kontrollit.
Lesi ka deklaruar se gjithçka ka qenë me leje dhe shkalla është vendosur për emergjencën e punonjësve dhe gazetarëve në rast zjarri, por policia e ka shoqëruar në komisariatin nr. 2.
Pas verifikimeve Lesi është lënë i lirë, ndërsa akuzon se ngjarja ka sfond politik.
“Reagim inatçor i njerëzve të kryeministrit Rama pas shkrimeve kritike ndaj qeverisë dhe zyrtarëve të korruptuar të administratës ekzekutive.
Një kujtesë për kryeministrin Rama: Gazeta “Koha Jone” ka provuar e përballuar dhunën dhe djegien e pushtetit të ish-presidentit Berisha si dhe presionin dhe gjyqet e ish-kryeministrit Nano.
Ndaj kujdes zoti Edi Rama, pasi dikur keni qenë edhe vetë gazetar dhe analist i kësaj gazete të lirë.
Kështu e filluan marrjen e pushtetit edhe Berisha (1992-1997) dhe Fatos Nano (2003-2005), me sulm direkt dhe që në fillim ndaj gazetës së parë të lirë në Shqipëri, por u rrëzuan…” shprehet Nikolla Lesi pas ngjarjes.
