Vendi ynë, i pesti për numrin e shtetasve që trokitën në Europë
Gjatë vitin 2015 kanë qenë plot 65.935 shtetas të Shqipërisë të cilët kanë kërkuar azil në një nga vendet e BE. Shifrën e ka dhënë Eurostat, në raportin më të fundit për azil-kërkuesit që kanë aplikuar në vendet e Bashkimit Europian. Raporti ka nxjerrë si të dhënë që destinacioni më i kërkuar nga shqiptarët është Gjermania, ku ka patur 53.805 aplikime për të përfituar azil. Në renditjen e përgjithshme të vendeve nga vijnë kërkesat për azil Shqipëria renditet e pesta pas Sirisë, Afganistanit, Irakut dhe Kosovës.
Me origjinë nga Kosova gjatë vitit të kaluar janë regjistruar 68.885 aplikime.
Sipas raportit të Eurostat, në vitin 2015 drejt vendeve të BE-së kanë udhëtuar me shpresën e qëndrimit të përhershëm mbi 1.2 milionë emigrantë. Kjo shifër është dy herë më lartë se ajo e regjistruar në vitin 2014.
