Brenda pesë viteve Tirana do të jetë si Korça, do të ketë 24 orë ujë të pijshëm pa ndërprerje, ka qenë premtimi i kryetarit të bashkisë Erion Veliaj.
Ai u shpreh se rregullimi i çmimit të ujit me 20 lekë për konsumatorët familjarë do mundësojë përmirësimin financiar të UKT-së, për t’i hapur rrugë investimeve të mëdha e të nevojshme për t’u siguruar që pas 5 vitesh qytetarët të kenë 24 orë ujë në rubinet.
“Me rregullimin që do të bëjmë, ku uji në Tiranë të paktën të paguhet sa në Bathore, për t’u siguruar që kemi investime dhe të vazhdojmë me këtë cilësi, atëherë do të kapim fatin e Korçës, ku Korça ka sot ujë 24 orë. Do ta kapim ujin 24 orë në Tiranë në 5 vitet e ardhshme”, tha kreu i Bashkisë së Tiranës, Veliaj, teksa përuroi rrugën e re “Dalip Topi” në Njësinë Administrative Nr. 3.
