Shpëtim Idrizi i pranishëm në ambientet e Komisionit Qendror të Zgjedhjeve gjatë rinumërimit të votive të kontestuara nga forca që ai drejton, ka denoncuar rastin e një vote të pavlefshme në kurriz të PDIU.
Idrizi thotë se KQZ cilësoi të pavlefshme një votë në të cilën ishte hedhur qartë vullneti i qytetrait, duke vepruar ndryshe në raste të kundërta.
Në fletën e votimit të bërë publike nga kreu i PDIU duket qartë një emër i shënuar përkrah “X” që është në kutinë që i korrespondon PDIU.
Në fletë ishte shënuar emri i qytetit çam të Margëlliçit dhe shqetësimin e anëtarëve të KQZ rreth këtij shënimi Idrizi e paralelizon me reagimin që ngjalli te grekët guri me emrin e Filatit në sheshin “Skënderbej”.
“Komisioni Qendror i Zgjedhjeve, sapo e quajti të pavlefshme këtë votë të hedhur për PDIU-në, kur vullneti i qytetarit që e ka hedhur duket më se i qartë. Shenja X ishte atje ku duhet dhe po ashtu ka pasur dhjetëra fletë ku ka pasur fjalë të shkruara sikurse është rasti i kësaj flete, që u konsideruan të vlefshme. Pak ditë pasi tjetërkush reagoi ndaj gurit me emrin Filat në sheshin Skënderbej, po shohim që emri i qytetit çam të Margëlliçit po shqetëson anëtarët e KQZ-së. Kujt i dhemb syri nga fjala Margëlliç të shkruajtur aty?!”, ka shkruar Idrizi.
