Në tre tendera energjia e shitur më e lirë se në tregun rajonal
Të ardhurat e KESH nga shitja e energjisë elektrike në këto dy muajt e fundit kanë shkuar në 4 milion euro. Korporata me anë të tre tenderave në shkurt e mars ka shitur mbi 200 mijë megavatorë energji të tepërt, të prodhuar falë situates shumë të mire hidrike. KESH njoftoi se ka tenderuar së fundi me 5 kompani vendase e të huaja eksportin e 77,8 mijë megavatëve energji elektrike me një vlerë prej 1.7 milionë euro. Ky është tenderi i tretë që kompania organizon për eksportin brenda këtij viti duke i siguruar rreth 4 milionë euro të ardhurave të për muajt shkurt dhe mars.
Çmimi mesatar i energjisë së shitur në tenderin e fundit ishte 21.1 euro për megavatorë, në një kohë që çmimi i burses së Hungarisë që merret si reference nga KESH, dje është regjistruar 28,33 euro për megavat për çmimet bazë dhe 33.4 euro për çmimet pik. Sipas çmimeve të Bursës Hungareze KESH e shiti energjinë 25% më lirë se çmimet bazë të bursës.
Por ekspertët e kompanisë kanë thënë se, KESH i shet tepricat e energjisë në fasha, të cilat kushtojnë shumë më lirë se sa çmimet pik dhe çmimet bazë. Shitja e energjisë me cmime më të ulta se sa tregu rajonal ka ndodhur edhe në 2 tenderat e muajit shkurt të realizuara po nga KESH.
