Raporti i ASD: Pjesa dërrmuese e kursimeve, në pak duar
Pjesa më e madhe e kursimeve të depozituara në bankat e nivelit të dytë është e përqëndruar në vetëm pak duar. Agjencia e Sigurimit të Depozitave në një raport të dorëzuar në Kuvendin e Shqipërisë ka përllogaritur që 4 përqind e depozituesve në Shqipëri zotërojnë 4.1 miliardë dollarë depozita në banka.
Sipas raportit të ASD-së, vitin e kaluar, mbi 58 përqind e totalit të depozitave në sistemin bankar zotëroheshin nga vetëm 4 përqind e individëve. Kjo do të thotë se, pjesa tjetër, pra 96 përqind e individëve ndajnë mes tyre 42 për qind të totalit të kursimeve. E shprehur në vlerë rezulton se, për individët që bëjnë pjesë në 4 përqindëshin e kursimtarëve të mëdhenj, sasia mesatare e depozitës është 48 mijë dollarë. Ndërsa 96 përqindëshi tjetër i individëve ka një kursim mesatar prej vetëm 1.400 dollarësh për person, ose 34 herë më pak.
Të dhënat e detajuara të ASD-së tregojnë se, në fund të vitit të kaluar, individët zotëronin në total rreth 890 miliardë lekë depozita në banka. Sipas monedhave, 51 për qind e tyre janë në lekë, ndërsa pjesa tjetër janë kursime në valutë.
Legjislacioni shqiptar në fuqi detyron që agjencia e depozitave të sigurojë plotësisht çdo depozitë bankare deri në 2.5 milionë lekë dhe të dhënat zyrtare tregojnë se, 96 për qind e individëve janë plotësisht të siguruar, pasi bien nën këtë nivel.
