Gjiknuri: TEC-i Vlorë për shumë vite ka qenë një projekt i dështuar
Lidhja me gazsjellësin Trans Adriatik Pipeline TAP do të jetë e vetmja mënyrë për të vënë në punë TEC-in e Vlorës. Autoritetet shqiptare në bashkëpunim me ekspertë të huaj dhe financim të qeverisë zvicerane po kryejnë për këtë qëllim një studim fizibiliteti, për linjën lidhëse të gazit nga Fieri deri tek TEC-i i Vlorës. “Për shumë vite ka qenë një projekt i dështuar, i dizenjuar për të punuar me naftë edhe me gaz, por që gaz nuk ka patur. Që ky projekt të marrë jetë dhe të bëhet i vlefshëm për portofolin energjetik shqiptar është shumë i rëndësishëm lidhja e tij me sistemin e gazit. Projekti merr përsipër të bëjë studimin e fizibilitetit për lidhjen nga pika e daljes të gazit në Fier me termocentralin e Vlorës, që ta bëjë përfundimisht edhe këtë termocentral një nyje shumë të rëndësishme të prodhimit të energjisë”, ka thënë sot ministri i Energjetikës Damian Gjiknuri.
TEC-i i Vlorës një projekt i nxitur dhe konsultuar nga Bankës Botërore me qëllim diversifikimin e burimeve të energjisë, përfundoi në vitin 2009 dhe që prej atëherë nuk u bë e mundur të vihej në punë për shkak të një defekti në ndërtim.
Për ndërtimin e tij qeveria shqiptare ka marrë një kredi 80 milionë euro nga BERZH dhe BEI, për të cilën paguan rregullisht principal dhe interesa. Planifikohej që kredia të shlyhej me të ardhurat që do të siguroheshin nga shitja e energjisë, por dështimi i projektit që në nisje ka bërë që kredia për ndërtimin e tij të paguhet nga taksat e shqiptareve për një shërbim që nuk është ofruar kurrë.
