Policia e Shtetit ka zbardhur ekzekutimin e oficerit të Policisë së Shtetit, Artan Cuku. Në pranga ka përfunduar Mikel Shallari, 24-vjeçar, nga Kuçova dhe banues në Tiranë.
“Në vlerësim të informacioneve, formave dhe metodave të policisë dhe ato shkencore dhe në bashkëpunim të ngushtë me partnerët ndërkombëtarë, më datë 10 qershor 2017, u bë i mundur ekzekutimi i urdhrit të ndalimit të prokurorit për të dyshuarin e vrasjes së ndodhur më 8/04/2017, ku u vra më armë zjarri shtetasi Artan Cuku, ish-oficer policie.
Autori i kësaj ngjarje është shtetasi Mikel Edmond Shallari, i datëlindjes 1993, lindur në Kuçovë dhe banues në “Qytetin Studenti” në Tiranë. Vazhdon puna intensive nën drejtimin e Prokurorisë për dokumentimin e plotë ligjor të kësaj ngjarje. Roli i Mikel Shallarit në këtë ngjarje është si ekzekutor”- tha drejtori i Policisë së Shtetit, Haki Çako.
Çako bëri me dije se po punohet edhe për arrestimin e bashkëpunëtorëve të tjerë të ngjarjes.
