Bankat kreditore në hall, kompania shtetërore ka përparësi ligjore
Të gjithë borxhlinjtë e kompanisë ARMO janë në hall për paratë e veta. Miliona euro borxhe të krijuara në pak vjet kanën vënë në garë tatimet, kompanitë shtetërore e private si edhe bankat e nivelit të dytë se kush të mund të përfitojë i pari nga paratë që grumbullohen nga shitja e aseteve të kompanisë tashmë realisht të falimentuar. Së fundi edhe Albpetrol, kompania shtetërore e nxjerrjes së naftës, fitoi gjyqin për një borxh 30 milion euro që ARMO I detyrohej për mospagesat e faturave të naftës së papërpunuar që kishte marrë për vite me radhë.
Dhe kompania shtetërore sipas Kodit të Procedurës Civile, ka të drejtën ligjore që të përfitojë përpara borxhlinjve të tjerë të shumtë të ARMO-s.
Vetëm pak ditë më parë dështoi një ankand i dytë i një shoqërie përmbarimore e cila po tenton të shesë një pjesë të rafinerisë së ARMO, për llogari të bankës Raiffeisen, tek e cila ARMO ka pashlyer 20 milionë euro kredi.
Por edhe Albpetrol megjithëse e fitoi gjyqin ka edhe të tjerë në radhë para tij, janë tatimet tek të cilat ARMO ka 53 milionë USD në tatime pa llogaritur gjobat e kamtëvonesat.
Kështu sipas ligjit çdo e ardhur që sigurohet nga përmbaruesit privatë për llogari të bankës fillimisht do të shkojë për tatimet e më pas për Albpetrol, I cili ka të hapur edhe një tjetër cështje gjyqësore me ARMO ku pretendon edhe 20 milionë dollarë.
Problemet që ka krijuar ARMO në treg janë shumë të mëdha dhe shteti është në kërkim të një zgjidhjeje, pasi ARMO praktikisht ka falimentuar, por ligji që e klasifikon atë si sektor strategjik pengon procesin e falimentit. Një korrespondencë ndërmjet dikastereve të qeverisë zbardh planin se si do të falimentohet dhe pas do të shtetëzohet ARMO, e cila ka aktualisht ndaj të tretëve mbi 300 milionë euro borxhe.
