15 efektivë policie në Maqedoni janë pezulluar nga detyra pasi akuzohen se nuk kanë kryer detyrën e tyre ditët e episodit të dhunshëm në Parlament, ku mbetën të plagosur dhjetra persona.
Nga hetimet ka rezultuar se 11 policë nga sektori i Punëve të Brendshme në Shkup dhe 4 policë të njësisë së nderhyrjes së shpejtë nuk ndërmorrën asnjë hap parandalues edhe pse situata ishte mjaft e tensionuar. Sipas raportit të Ministrisë së Brendshme policët neglizhuan vërshimin e dhunuesve e më vonë u panë duke shëtitur korridorëve të Kuvendit. Ndaj 15 agjentëve janë marrë masa disiplinore dhe është vendosur pezullimi i përkohshëm.
Nga ana tjetër ka reaguar sindikata e policisë, e cila pretendon një qasje më serioze ndaj këtij rasti, me argumentin se më 27 prill, efektivët e patën të vështirë përballjen me turmën e acaruar të njerëzve.
