“Shtyrja e datës së zgjedhjeve për në 16 korrik dhe pikat e tjera të paketës McAlllister Plus për të cilat palët janë dakorduar, japin garancitë e duhura për një proces të ndershëm zgjedhor dhe do ta kthejnë skenën tonë politike në shinat e jetës institucionale dhe normalizimit”
Kryetari i PDIU-së Shpëtim Idrizi përshëndet marrëveshjen e arritur mbrëmë, mes kryeministrit Rama dhe kryetarit të opozitës Lulzim Basha, për zgjidhejn e krizës politike. Përmes një mesazhi në facebook, Idrizi thekson se fryma e dialogut është e vetmja që i shërben atdheut. Shtyrja e datës së zgjedhjeve më 16 korrik, bashkë me pikat e tjera të paketës Mc Allister, nxjerrin vendin nga spiralja e konfliktit ku ishte future, shkruan Idrizi. Por për këtë marrëveshje, kreu i PDIU-së, shpreh mirënjohjen e partnerëve ndërkombëtarë pa të cilët nuk do të kishte qënë e mundur zgjidhja e krizës.
“Përshëndes arritjen e marrëveshjes së shumëpritur mes mazhorancës dhe opozitës duke hedhur një hap të rëndësishëm për nxjerrjen e vendit nga spiralja konfliktuale ku ishte futur. Unë besoj se shtyrja e datës së zgjedhjeve për në 16 korrik dhe pikat e tjera të paketës McAlllister Plus për të cilat palët janë dakorduar, japin garancitë e duhura për një proces të ndershëm zgjedhor dhe do ta kthejnë skenën tonë politike në shinat e jetës institucionale dhe normalizimit. Po ashtu jam i bindur se vetëm fryma e dialogut dhe mirëkuptimit mund ta çoj atdheun tonë përpara. Me këtë rast shpreh mirënjohjen për partnerët tanë evropianë dhe amerikanë të cilët me ndërmjetësimin dhe këshillimin e tyre dhanë një kontribut vendimtar për stabilitetin e vendit tonë. #VeçNjëAtdhe”- shkruan Idrizi.
