Policia e Korfuzit ka dhënë detaje mbi veprimtarinë e një grupi trafikantësh të drogës, të përbërë nga grekë dhe shqiptarë, që kishin përfituar më shumë se 480 mijë euro nga veprimtaria e tyre.
Sipas policisë, grupi importonte sasi të mëdha heroine nga Shqipëria, të cilat, pasi i përpunonte, i shpërndante në tregun grek, kryesisht në ishullin e Korfuzit.
Policia thotë se janë dashur disa muaj punë intensive, ku janë përdorur metoda dhe teknika të posaçme hetimi, për të identifikuar dhe verifikuar rolin dhe aktivitetin e secilit prej pjesëtarëve të grupit kriminal.
Dosjet penale janë hartuar për 28 persona, 15 grekë dhe 13 shqiptarë. Janë arrestuar deri tani 21 prej tyre, dhjetë prej të cilëve muajin e kaluar, që aktualisht ndodhen në burg. Ndërsa 4 shtetas shqiptarë dhe 3 grekë janë shpallur në kërkim.
Autoritetet thonë se grupi kishte trafikuar brenda vitit të fundit të paktën 12 kg heroine dhe përfitimi financiar përllogaritet në 480.000 euro.
