Në një dalje jo të zakonshme për këtë të enjte, e cila zakonisht i dedikohet folësve deputetë të PD, Lulzim Basha mirëpriti në çadrën e protestës kreun e komisionit të punëve të jashtme në parlamentin hungarez.
“Nuk është zakoni im të jem këtu ditën e enjte paradite, është dita e deputetëve, por jam për të mirëpritur një nga miqtë më të çmuar të Shqipërisë, një nga luftëtarët e parë dhe të paepur për lirinë dhe demokracinë në Europën Lindore dhe në Shqipëri, kryetarin e komisionit të punëve të jashtme në parlamentin hungarez, Zsolt Németh”- u shpreh Basha për vizitorin special të çadrës.
Basha nënvizoi edhe njëherë se nuk do ketë asnjë tërheqje të opozitës nga garancitë minimale për zgjedhje të lira dhe të ndershme.
Nga çadra e protestës, edhe ish- kryeministri Sali Berisha apeloi kryeministrin Rama të pranojë zgjidhjen politike ose në të kundërt, alternativë ka vetëm zgjidhjen fatale.
