Kryeministri Edi Rama ka ironizuar sërish, çadrën e opozitës në Bulevard, duke thënë se çadra e PD përpara zyrës së tij në Kryeministri është si një serë e cila nuk riciklon.
Gjatë inaugurimit të impiantit të përpunimit të mbetjeve dhe prodhimit të energjisë, në Elbasan, Rama tha përveç impaktit ekonomik ka edhe atë social për mbrojtjen e mjedisit, ndërsa akuzoi paraardhësit e tij në pushtet se qeverisën mbi plehra.
Rama tha se një impiant i tillë do të ndërtohet edhe në Fier, ndërsa theksoi se do vijojë puna për të bindur banorët të cilët kanë kundërshtuar projektin e landfillit në fshatin Mbrostar.
Në inaugurimin e impiantit të përpunimit të mbetjeve në Elbasan, kryeministri shoqërohej nga ministri i Mjedisit Lefter Koka, ai i Financave Arben Ahmetaj si dhe kryetari i Bashkisë së Elbasanit, Qazim Sejdini.
“Kjo punë kaq e mirë që po shikoj është falë bashkëpunimit ndërmjet ministrisë së Mjedisit dhe asaj të Financave dhe kjo që ma zbukuroi ditën.
Çfarë u tha dhe çfarë është bërë është me të vërtetë jashtë parashikimeve. Ministri i Mjedisit dhe ai Financave, megjithëse është Gjirokastrit, e zgjidhi deri në fund qesen, gjë që ju siguroj nuk është e lehtë”, tha Rama me humor.
