“Heqja cënon strategjinë e qeverisë për konsolidimin e financave”
Fondi Monetar Ndërkombëtar deklaroi se heqja e taksave për biznesin e vogël duhet të anulohet pasi cenon strategjinë e qeverisë për konsolidimin e financave publike. “Strategjia e qeverisë për konsolidim gradual që bazohet në zgjerimin e bazës së tatimpaguesve dhe përmirësimin e administrimit, është e duhura. Në këtë drejtim përjashtimi i bizneseve të vogla nga taksat minon këtë strategji dhe duhet anuluar”, thuhet në raportin e FMN-së.
Në raportin e posaçëm për Shqipërinë, Fondi përgëzon vullnetin e qeverisë për të mbajtur nën kontroll deficitin dhe huamarrjen, ndonëse vëren se kjo është bërë e mundur jo nga rritja e të ardhurave, por duke shkurtuar shpenzimet, veçanërisht ato për investime
Ekspertët e FMN thonë se mosrealizimi i të ardhurave për vitin e kaluar ishte i lidhur me disa shkaqe përfshirë problemet e administrimit. Përballë kësaj situatë në shtator të vitit të kaluar qeveria nisi një fushatë të gjerë anti-informalitet, por FMN preferon të mbajë një qëndrim konservator për rezultatet e pritshme.
“Pavarësisht rritjes impresive në regjistrimet e reja të biznesit dhe punonjësve, rritja e të ardhurave është e vështirë për t’u vlerësuar dhe do të jetë e kufizuar”, vijon raporti i FMN.
Sipas këtij institucioni, shumica e bizneseve të reja që janë regjistruar bien në kategorinë e ndërmarrjeve mikro ose atyre të vogla, të cilat kanë impakt të limituar në të ardhurat nga taksat.
Po kështu, FMN vëren se pavarësisht aksionit nuk ka patur rritje në xhiron e deklaruar të bizneseve që janë në skemën e TVSH-së. Në lidhje me zhvillimet në ekonominë reale, FMN vlerëson se ekonomia shqiptare vazhdon të rimëkëmbet, ndonëse me një ritëm më të ngadaltë nga sa ishte parashikuar fillimisht. / Top Channel
