“Kemi gjysmën e Parlamentit që mungon. Unë mendoj që kësaj gjysme nuk i është shtrirë akoma dora e bashkëpunimit. Sot, treguat me aktin tuaj se nuk i merni parasysh jo vetëm kërkesat e opozitës, por edhe të aleatëve tuaj.”
Kryetarja e grupit parlamentar të PDIU-së Mesila Doda reagoi ashpër ndaj vendimit të PS-së për të përjashtuar PDIU-në nga e drejta për t’u përfaqësuar në komisionet Ad-hoc për vetting-un.
Doda akuzoi ashpër kreun e shumicës në pushtet dhe ligjvënësit e tij në Kuvend pas rrëzimit të kandidaturës së Shpëtim Idrizit si anëtar i Komisionit Ad-hoc për vetting-un.
“Sot, shqiptarët kanë parë një tjetër fytyrë të politikës që nuk e do drejtësinë. Kryetari i Kuvendit të Shqipërisë solli kërkesën, sipas të cilës grupet parlamentare duhet të sjellin vetëm nga një propozim.
Sot, kemi gjysmën e parlamentit që mungon, unë mendoj që kësaj gjysme nuk i është shtrirë akoma dora e bashkëpunimit. Sot, treguat me aktin tuaj se nuk i merni parasysh jo vetëm kërkesat e opozitës, por edhe të aleatëve tuaj.”, tha Mesila Doda.
Më pas ajo shtoi: “Partia në pushtet tentoi për të na futur në Komision për opozitë, por PDIU nuk bëhet pjesë e Teatrit të Kukullave.”
Në seancën e jashtëzakonshme plenare janë votuar anëtarët e Komisionit të Vlerësimit të vetting-ut. Kuvendi ka vendosur të votojë dy anëtarë të propozuar nga PS, një nga LSI, ndërsa është përjashtuar në mënyrë arbitrare anëtari i PDIU-së. Tashmë kriza brenda mazhorancës është e plotë.
Votimi i Kuvendit për anëtarët e Komisionit të Vlerësimit të vetting-ut
Ulsi Manja – 78 pro dhe 1 kundër
Vasilika Hysi – 80 pro, 1 kundër, 1 abstenim
Luan Rama – 85 pro, 0 abstenim
Shpëtim Idrizi – 23 pro, 7 kundër, abstenim 50
