Në festimet e Ditës së Komunës së Ulqinit, Presidenti Bujar Nishani zhvilloi një takim me Presidentin e Malit të Zi Filip Vujanovic ku diskutuan për forcimin e mëtejshëm të marrëdhënieve midis dy vendeve dhe mbi rëndësinë e anëtarësimit të Malit të Zi në NATO.
Nishani theksoi se anëtarësimi në aleancën politiko-ushtarake të Atlantikut të Veriut jo vetëm u shërben dhe rrit sigurinë e qytetarëve malazezë, por është një kontribut në të mirë të sigurisë së mbarë rajonit.
“I shpreha Presidentit Vujanoviç vlerësimet e mia më të mira për respektin që autoritetet, shteti i Malit të Zi u adreson shqiptarëve në Malin e Zi. Jam i bindur gjithashtu se shqiptarët e Malit të Zi, si deri më tani, do të vazhdojnë të jenë kontribues të rëndësishëm të shtetit e vendit të tyre dhe duke e adresuar Malin e Zi në të gjitha proceset e integrimit euro-atlantik. Njëkohësisht gjej rastin të falënderoj shqiptarët në Mal të Zi për përpjekjet e tyre të jashtëzakonshme që vazhdojnë të bëjnë për të ruajtur vlerat e trashëgimisë dhe identitetit të tyre kombëtar”, tha Nishani.
Nga ana e tij Vujanoviç e falënderoi Presidentin Nishani për ndihmën e çmuar dhë mbështetjen për anëtarësimin e Malit të Zi në NATO.
