GoBankingRates: Për nevojat e domosdoshme duhen 630 dollarë në muaj
Në listën e 50 vendeve me koston më të lirë të jetesës Shqipëria është e 28-ta. Me këtë renditje vendi ynë është më i shtrenjti i rajonit sa i takon cmimeve që duhen paguar për nevojat e domosdoshme. Këtë e tregon një renditje që ka bërë GoBankingRates dhe që është e publikuar në gazetën e njohur Time.com. Kjo renditje është bërë mbi bazën e katër kritereve që janë: fuqia blerëse, kostot e qirave, indeksi i çmimit të ushqimeve dhe cmimet e shërbimeve. Për të caktuar vendin me kosto më të ulët këto tregues krahasohen me standardin e Nju Jorkut.
Bazuar në të dhënat e mbledhura vendi ynë krahasuar me Nju Jorkun ka fuqi blerëse 58.8 për qind më të ulët, qiratë janë 90.8 për qind më të lira, ushqimet 72 për qind më të lira dhe shërbimet e të mirat 64.4 për qind më të lira.
Bazuar në këto të dhëna është përllogaritur që për të jetuar në Shqipëri nevojiten rreth 630 dollarë në muaj.
Me këto shifra Shqipëria me standartin e ulët të pagave mbetet një vend shumë i shtrenjtë për tu jetuar nga vendasit. Po ashtu ka humbur edhe garën rajonale pasi është me koston më të shtrenjtë të jetesës krahasuar me fqinjët e saj. Bazuar në shifrat e GoBankingRates vendi më i lirë i rajonit është Maqedonia, e cila renditet e 10-ta më e lira në botë dhe e para në Ballkan. Renditja vijon me Bosnjën e 11-ta, Serbinë e 18-ta dhe Mali i Zi i 26-ti në botë. Vendet më të lirë për t’u jetuar sipas këtij klasifikimi kanë rezultuar të jenë Afrika e Jugut dhe India.
