Gjykata Kushtetuese ka zbardhur vendimin për shkarkimin e Elvis Roshit si kryetar i Bashkisë së Kavajës.
Kushtetuesja me anë të një vendimi prej 11 faqesh ka argumentuar se përse vendimi i KQZ-së dhe ai i Këshillit të Ministrave për shkarkimin është kushtetues, duke rrëzuar kërkesën e Roshit.
Çështja u gjykua nga gjyqtarët: Bashkim Dedja, Kryetar, Vladimir Kristo, Vitore Tusha, Altina Xhoxhaj, Fatmir Hoxha, Besnik Imeraj, Fatos Lulo, Gani Dizdari.
Vendimi i Kushtetueses pritet të publikohet në Fletore Zyrtare dhe nga çasti që publikohet aty, Presidenti i Republikës Bujar Nishani ka afat 48 orë kohë për të dekretuar datën e zgjedhjeve në Kavajë, të cilat duhet të mbahen brenda 45 ditëve nga dekretimi i datës.
