Nënkryetari i LSI, Luan Rama ka deklaruar se Kuvendi nuk po ndjek zbatimin e ligjeve për të luftuar kultivimin e lëndëve narkotike, fenomen për të cilin edhe institucionet ndërkombëtare kanë shprehur shqetësim.
Në seancën e sotme plenare Luan Rama ka prekur sërish çështjen e narkotikëve, e kthyer së fundmi në një kontest mes tij dhe ish-ministrit të Brendshëm, Saimir Tahiri.
“A ka vend këtu për të qenë krenarë se ne e paskemi bërë detyrën tonë dhe se zëdhënësi i LSI e paska lexuar gabim raportin e Departamentit të Shtetit? Dhe se hienat kanë dalë nga zyra e LSI-së? Ky është realiteti?”, është shprehur Rama.
Rama tha se një problem tjetër shumë i rëndësishëm është edhe asgjësimi i lëndëve narkotike të sekuestruara, që është kryer në shkelje me ligjin.
“Ligji e thotë qartë se asgjësimi bëhet në prani të prokurorit, të oficerit të policisë gjyqësore dhe personit të caktuar nga gjykata. Dhe për dokumentimin e këtij veprimi mbahen 3 proces-verbale. Kemi të paktën 13 raste të asgjësimit ku nuk ka qenë prokurori dhe nuk ka pasur proces-verbale dhe një pjesë e të arrestuarve kanë mbetur nëpër gjykata pasi nuk ka prova për lëndën narkotike. Edhe droga që sekuestroi policia në Lazarat është asgjësuar në shkelje me ligjin”, ka thënë Rama.
