Kreu i Lëvizjes Socialiste për Integrim, Ilir Meta ka theksuar rëndësinë e zgjedhjeve të lira e të ndershme, si një nga faktorët kyç në integrimin europian të vendit.
Në përfundim të mbledhjes së kryesisë së LSI, Meta tha se dialogu mazhorancë-opozitë është e vetmja rrugë për zgjidhjen e probleme.
“Mendoj se dialogu është e vetmja rrugë për të zgjidhur çështjet që ngrihen. Kërkohen garanci lidhur me standardin e zgjedhjeve dhe duhet të punohet me reformën zgjedhore, që duhet ët kishte përfunduar prej kohësh. Asnjëherë nuk duhet hequr dorë nga dialogu, pasi është kyç për suksesin e reformave që kemi ndërmarrë. Kurorëzimi me sukses i zgjedhjeve është vendimtar për vitet që vijnë, por edhe më tepër se kaq”, tha Meta.
“Qëndrimi i LSI është mjaft i qartë, zgjedhjet e 18 qershorit janë vendimtare për të ardhmen europiane të Shqipërisë. Ato së bashku me zbatimin e reformës në drejtësi dhe fillimit të procesit të vettingut, janë kyçe, përfshirë edhe standardin e këtyre zgjedhjeve për çeljen e negociatave për anëtarësim. Janë të rëndësishme edhe për zbatimin me sukses të reformës në drejtësi”, tha Meta.
Në mbledhjen e sotme të LSI, u emëruan edhe krerët e komisioneve të partisë, të cilët do të fillojnë menjëherë punën, kur edhe pak muaj na ndajnë nga zgjedhjet e përgjithshme.
